+255 222151367/9   info@mloganzila.or.tz



Wauguzi watakiwa kujituma na kuzingatia weledi katika kazi

May 5 2021

Kaimu Mkurugenzi Msaidizi wa Huduma za Uuguzi na Ukunga MNH –Mloganzila, Sis. Redemptha Matindi akihutubia katika ufunguzi wa maadhimisho ya siku ya wauguzi duniani yaliyofanyika Hospitali ya Taifa Muhimbili – Mloganzila.

Wauguzi wa MNH Mloganzila na Upanga wakisikiliza hotuba ya mgeni rasmi wakati wa maadhimisho ya siku ya wauguzi duniani.

Katibu wa Chama cha waugunzi MNH- Mloganzila Bw. Kaleb Kula akisoma risala kwa niaba ya wauguzi wakati wa ufunguzi wa maadhimisho ya siku ya wauguzi duniani.

Wauguzi wa Muhimbili Upanga & Mloganzila wakila kiapo cha kutoa huduma kwa kuzingatia maadili ya taaluma yao.

Wauguzi wa Hospitali ya Muhimbili (Upanga na Mloganzila) wametakiwa kuzingatia kiapo chao kwa kufanya kazi kwa bidii, kujitoa, kuzingatia weledi katika kuwahudumia wagonjwa kwakuwa muuguzi ndio mtu wa kwanza anayekutana na mgonjwa pindi anapofika hospitalini kupata huduma za afya.

Hayo yamesemwa leo na Kaimu Mkurugenzi Msaidizi wa Huduma za Uuguzi na Ukunga MNH –Mloganzila, Sis. Redemptha Matindi kwa niaba ya Mkurugenzi Mtendaji wa Hospitali ya Taifa Muhimbli wakati wa ufunguzi wa maadhimisho ya siku ya wauguzi duniani yaliyofanyika katika ukumbi wa mikutano Mloganzila.

“Heshima ya muuguzi inapatikana kutokana na kazi anayofanya, ambapo huduma wanazotoa zitasaidia watunga sera kujua kazi zinazofanywa, changamoto wanazokutana nazo katika kutoa huduma na kuona namna ya kuboresha maslahi yao” amesema Sis Matindi.

Pia amewashauri kujiendeleza kielimu, kufanya tafiti mbalimbali za afya, kujisimamia kufanya maamuzi kwa haraka na kujiamini ili kufanya kazi za uuguzi ziwe na thamani na kujulikana kwa jamii inayowazunguka.

Awali akisoma risala kwa niaba ya wauguzi wa Muhimbili Upanga &Mloganzila, Katibu wa Chama cha Wauguzi Muhimbili –Mloganzila Bw. Kaleb Kula ameupongeza uongozi wa hospitali kwa kutatua changamoto mbalimbali zinazowakabili.

“Wauguzi wenzetu wamefanikiwa kupata nafasi ya kwenda kujiendeleza katika ngazi mbalimbali za elimu kuendana na mpango mkakati wa hospitali na kuimarisha utoaji huduma ya uuguzi kuendana na ukuaji wa teknolojia, tafiti na maendeleo ya watu” amesema Bw.Kula.

Ameongeza kuwa ili kuendana na dunia ya sasa yenye kuzingatia taaluma, tafiti, maadili na mabadiliko ya teknolojia, wauguzi wamekuwa mstari wa mbele katika kufanya tafiti na kugundua mambo ambayo yamekuwa msaada muhimu katika kutoa huduma ambapo wamefanikiwa kugundua mashine ya kusaidia kupumua kwa mtoto njiti na kuandika vitabu vinavyosidia kuboresha utoaji wa huduma za afya nchini.

Katika kuelekea maadhimisho ya siku ya wauguzi duniani kulitanguliwa na utoaji wa elimu ya afya kwa wanafunzi wa Shule ya Sekondari Malamba-mawaili iliyopo Manispaa ya Ubungo ambapo mada mbalimbali ziliwasilishwa na kujadiliwa.

Maadhimisho ya siku ya wauguzi dunia yatafanyika Mei 12 Mkoani Mnyara ambapo kauli mbiu ya mwaka huu “Wauguzi sauti inayoongoza, Dira ya huduma ya afya”.