Dkt. Mfaume aitaka Mloganzila kuwajengea uwezo wataalamu wa RRH

Jan 10 2023

Mganga Mkuu wa Mkoa wa Dar es Salaam Dkt. Rashid Mfaume akizungumza wakati wa ufunguzi wa kambi ya uchunguzi na matibabu inayoendeshwa na Madaktari Bingwa wa Hospitali ya Taifa Muhimbili Mloganzila kwa kushirikiana na Madaktari wa Hospitali ya Mwananyamala inayoendelea katika viwanja vya Hospitali ya Mwananyamala mkoani Dar es Salaam.

Naibu Mkurugenzi Mtendaji Hospitali ya Taifa Muhimbili Mloganzila Dkt. Julieth Magandi akizungumza kwa niaba ya Mkurugenzi Mtendaji wakati wa ufunguzi wa kambi hiyo inayoendelea katika viwanja vya Mwananyamala.

Baadhi ya wananchi waliofika katika kambi hiyo wakisubiri kupata huduma .

Kaimu Mganga Mfawidhi wa Hospitali ya Rufaa ya Mkoa Mwananyamala Dkt. Aileen Malongo akisoma taarifa fupi mbele ya mgeni rasmi kuelezea hali ya utoaji wa huduma za uchunguzi na matibabu inavyoendelea katika kambi hiyo.

Baadhi ya wanachi waliofika katika kambi hiyo wakipatiwa elimu ya lishe na namna bora ya kuzingatia mlo sahihi ili kujikinga na magonjwa yasiyoambukizwa.

Wataalamu wakiendelea kutoa huduma.

Mtaalamu wa macho akimfanyia uchunguzi mwananchi aliyekuja kupata huduma ya matibabu katika kambi hiyo.

Baadhi ya wananchi waliofika katika kambi hiyo wakisubiri kupata huduma .

Mganga Mkuu wa Mkoa wa Dar es Salaam Dkt. Rashid Mfaume ameitaka Hospitali ya Taifa Muhimbili Mloganzila kuendelea kuwajengea uwezo wataalamu wa Hospitali za Rufaa za Mikoa (RRH) ili kuweza kusaidia upatikanaji wa huduma za kibingwa kwa wananchi.

Dkt. Mfaume amesema hayo wakati wa ufunguzi wa kambi ya uchunguzi na matibabu inayoendeshwa na Madaktari Bingwa wa Hospitali ya Taifa Muhimbili Mloganzila kwa kushirikiana na Madaktari wa Hospitali ya Mwananyamala inayoendelea katika viwanja vya Hospitali ya Mwananyamala mkoani Dar es Salaam.

"Wananchi wa Wilaya ya Kinondoni na maeneo jirani  changamkieni fursa ya kupata huduma, kambi hii ni ya kipekee tofauti na zile ambazo huwa zinafanyika viwanjani,  wataalamu wamekusanyika hapa kuna maabara, vipimo vya ECG na ECHO na Radiolojia, mgonjwa anapokelewa anafanyiwa vipimo, tatizo lake likibainika anapewa matibabu hapa tena kwa gharama nafuu, kama anahitaji rufaa anapelekwa Mloganzila, " amesema Dkt. Mfaume

Amesema Hospitali za RRH zina wataalamu bingwa lakini wataalamu bobezi ni wachache, hivyo ni fursa pia kwa wataalamu wa Mwananyamala kujifunza.

Kwa upande wake Naibu Mkurugenzi Mtendaji Hospitali ya Taifa Muhimbili Mloganzila Dkt. Julieth Magandi amesema kuwa moja ya jukumu la Hospitali ya Taifa ni kuwajengea uwezo wataalamu wa Hospitali za ngazi za chini katika maeneo mbalimbali hivyo anaamini kupitia kambi kama hizi zitatimiza lengo hilo ambalo pia ni agizo la Wizara ya Afya.

"Huu ni mwanzo tu, tutafanya kambi hizi katika Hospitali Rufaa za Mikoa ambazo ni Temeke na Tumbi na baadaye tunahamia kwenye mikoa mingine pia suala la kufanya kambi za matibabu litawekwa kwenye mpango kazi wa mwaka wa Hospitali ya Mloganzila ili lifanyike Kwa ufanisi zaidi”  amesema Dkt. Magandi

Kwa upande wake Kaimu Mganga Mfawidhi  wa Hospitali ya Rufaa ya Mkoa Mwananyamala Dkt. Aileen Malongo amesema kuwa muitikio wa wananchi katika kambi ni mkubwa na kwamba huduma zinatolewa na Madaktari bingwa bobezi katika kada sita ambazo ni macho, magonjwa ya damu, moyo, kisukari, mfumo wa mkojo pamoja na mifupa.
 
“Kambi hii itafanyika kwa siku nne ambapo imeanza tarehe 9, na itandelea 10, 11 na 13 Januari 2023, gharama zimepunguzwa sana ili wananchi waweze kunufaika” amesema Dkt. Aileen

Kwa upande wake Mwl. Mansoor Nkondo ambaye amefika kupata huduma katika kambi amesema kuwa amepata matibabu kwa gharama sawa na bure.

“Jumla nimetumia TZS 17,000 nimeonana na daktari bobezi wa mifupa na daktari wa Tezi dume, nimefanyiwa vipimo na dawa nimepewa, nasema asante sana kwa wataalamu wetu" ameeleze Mwl. Mansoor