+255 222151367/9   info@mloganzila.or.tz



Huduma za afya zaendelea kuboreshwa Mloganzila

Aug 17 2022

Daktari Bingwa wa Magonjwa ya Dharura Prof. Lee Kang Hyun kutoka Chuo Kikuu cha Wonju Yonsei Severence Hospital akielezea namna ambavyo mgonjwa wa dharura anapaswa kupokelewa na kupewa huduma za haraka.

Daktari Bingwa wa Magonjwa ya Watoto Wachanga chini ya siku 28 kutoka Chuo Kikuu cha Wonju Yonsei Severence Hospital, Prof. Park Eun Yong akielezea namna ya kuwahudumia watoto wachanga na kusisitiza ushirikiano baina ya wauguzi na madaktari katika kuwahudumia watoto wachanga walio chini ya siku 28.

Baadhi ya wauguzi na Madaktari waliohudhuria mafunzo hayo wakifatilia mada kwa makini.

Daktari Bingwa wa Watoto MNH-Mloganzila Dkt. Karungi Karoma akiwaelezea wataalamu hao namna ambavyo wanawahudumia watoto wachanga waliozaliwa chini ya siku 28.

Baadhi ya wauguzi na Madaktari waliohudhuria mafunzo hayo wakifatilia mada kwa makini.

Baadhi ya Madaktari na wauguzi wa MNH-Mloganzila waliohudhuria mafunzo hayo wakiwa katika picha ya pamoja na Madaktari Bingwa kutoka Chuo Kikuu cha Wonju Yonsei Severence Hospital.

Madaktari na wauguzi wa Hospitali ya Taifa Muhimbili-Mloganzila wamejengewa uwezo wa namna ya kuhudumia wagonjwa wa dharura na watoto wachanga.

Mafunzo hayo yametolewa na Madaktari Bingwa kutoka Chuo Kikuu cha Wonju Yonsei Severence Hospital chini ya Taasisi ya Korea Foundation for Health Care (KOFIH) kutoka Serikali ya Korea Kusini lengo ikiwa ni kuendelea kuboresha huduma za afya katika maeneo mbalimbali ikiwemo Idara ya Magonjwa ya Dharura na Idara ya Magonjwa ya Watoto.

Akiongea katika mafunzo hayo Daktari Bingwa wa Magonjwa ya Dharura Prof. Lee Kang Hyun kutoka chuo hicho amesema kupitia mafunzo hayo madaktari na wauguzi wataelewa mfumo wa matibabu wa wagonjwa wa dharura ikiwemo mapokezi na matibabu yake.

“Matibabu ya mgonjwa wa dharura yanahusisha hatua mbalimbali na uangalizi wa pekee katika sekta ya afya ndio maana serikali imetoa namba maalum ambayo wananchi wanaweza kuitumia kwa ajili ya kupata msaada wa dharura katika matibabu” amesema Prof. Hyun

Kwa upande wake Daktari Bingwa wa Magonjwa ya Watoto Wachanga chini ya siku 28 kutoka Chuo Kikuu cha Wonju Yonsei Severence Hospital, Prof. Park Eun Yong amesisitiza ushirikiano baina ya wauguzi na madaktari katika kuwahudumia watoto wachanga walio chini ya siku 28.

Prof. Yong amesema kama kutakuwa na ushirikiano baina ya wataalamu kutasaidia kuboresha huduma za afya hasa kwa watoto wachanga walio chini ya siku 28 ambao wanahitaji uangalizi maalum.

Wataalam pia wametembelea mtambo wa kuzalisha hewa tiba (Oxygen generating plant) uliojengwa chini ya ufadhili wa serikali ya Korea Kusini na maeneo mengine ya kutolea huduma ikiwemo wodi wachanga walio chini ya siku 28, wodi ya wakina mama wajawazito walio chini ya uangalizi maalum, wodi ya watoto na wodi ya mama wajawazito.