+255 222151367/9   info@mloganzila.or.tz



Wataalamu wa afya wajengewa uwezo wa kutibu magonjwa ya moyo.

Oct 19 2021

Naibu Makamu Mkuu wa Chuo Taaluma, Tafiti na Ushauri kutoka Chuo Kikuu cha Afya na Tiba Shirikishi (MUHAS) Prof. Appolinary Kamuhabwa akizungumza wakati wa kufungua mafunzo ya wiki nne yanayofanyika Hospitali ya Muhimbili –Mloganzila yenye lengo la kuwajengea uwezo wataalamu wa afya namna ya kutumia kifaa maalum cha kutambua magonjwa ya moyo kiitwacho Eco Cardiology na namna ya kuwahudumia wagonjwa wenye matatizo ya moyo.

Kaimu Naibu Mkurugenzi Mtendaji wa Hospitali ya Taifa Muhimbili-Mloganzila Dkt.Julieth Magandi akizungumza kabla ya zoezi la ufunguzi wa mafunzo hayo

Mratibu wa mafunzo hayo ambaye pia ni Mhadhiri Mwandamizi kutoka MUHAS Dkt. Pilly Chillo akifafanua lengo la mafunzo hayo

Baadhi ya watalaamu kutoka taasisi mbalimbali za afya ndani na nje ya nchi wakifatilia kwa makini mada zilizowasilishwa wakati wa mafunzo hayo.

Dkt. Magandi akiwa katika picha ya pamoja na baadhi ya washiriki wa mafunzo hayo yanayoendelea Mloganzila.

Dkt. Magandi akiwa na baadhi ya viongozi, katikati ni Prof. Appolinary Kamuhabwa kutoka MUHAS na kushoto ni Mratibu wa mafunzo hayo Dkt Pilly Chillo

Madaktari na wataalam mbalimbali wa afya wametakiwa kuzingatia mafunzo yanayofundishwa kuhusu namna ya kutumia kifaa maalum cha kutambua magonjwa ya moyo (Echocardiography) ili waweze kuwahudumia wagonjwa wanaobainika kuwa na  matatizo hayo.
 
Hayo yamesemwa leo na Naibu Makamu Mkuu wa Chuo Kikuu cha Afya na Sayansi Shirikishi Muhimbili (MUHAS) anayeshughulikia  Taaluma, Tafiti na Ushauri Prof. Appolinary Kamuhabwa wakati akifungua mafunzo maalumu ya kutambua  magonjwa ya moyo yenye lengo la kuwajengea uwezo wataalam wa afya ikiwemo madaktari na wauguzi kuhusu namna ya kufanya vipimo vya moyo kwa kutumia kifaa maalum kiitwacho Echocardiography yaliyoratibiwa na  Kituo Cha umahiri cha kufundisha na kufanya utafiti wa Magonjwa ya moyo (The East African Centre of Excellence in Cardiovascular Sciences).
 
Prof. Kamuhabwa amesema magonjwa ya moyo yanaongezeka na teknolojia inakua duniani hivyo kila wakati wataalamu wanatakiwa kujifunza mbinu mpya kulingana na mahitaji ya teknolojia kwa wakati huo.
 
“Kwa kuwa magonjwa ya Moyo yanaongezeka kila siku na teknolojia inakuwa hivyo mafunzo haya yamekuwa na uhitaji mkubwa na yamevutia baadhi ya washiriki kutoka nchi jirani ikiwemo Rwanda na Uganda”, amesema Prof. Kamuhabwa
 
Pia, ameushukuru uongozi wa Hospitali ya Muhimbili-Mloganzila kwa kukubali mafunzo hayo kufanyika hospitalini hapo na kuwataka washiriki kutumia fursa hiyo  kujifunza ipasavyo kwa kuwa mazingira yanaruhusu.
 
Kwa upande wake Kaimu Naibu Mkurugenzi Mtendaji Muhimbili Mloganzila, Dkt. Julieth Magandi amesema  mafunzo hayo yamefanyika Mloganzila kwa kuwa ni eneo la zuri, mazingira yake ni tulivu na yanaruhusu kujifunza.
 
Naye, Mhadhiri Mwandamizi na Mratibu wa mafunzo hayo kutoka MUHAS, Dkt. Pilly Chillo amesema  kuwa awali  mafunzo haya yalikuwa yanatolewa kwa madaktari bingwa na bobezi ila wameamua kuwapatia madaktari na wataalam wengine ili waweze kutambua dalili  za magonjwa ya moyo mapema na kuona kama wanaweza kutoa huduma katika ngazi zao za kutolea huduma au kuwapeleka katika hospitali za rufaa.
 
Mafunzo hayo yatafanyika kwa wiki nne kwa  ushirikiano wa Hospitali ya Taifa Muhimbili, Chuo Kikuu cha Afya na Sayansi Shirikishi (MUHAS ) na Taasisi ya Magonjwa ya Moyo ya Jakaya Kikwete(JKCI) huku yakihusisha washiriki 40 kutoka ndani na nje ya nchi.