+255 222151367/9   info@mloganzila.or.tz



Mloganzila yatoa elimu ya athari za tumbaku.

Jun 1 2021

Afisa Muuguzi Msaidizi kutoka Hospitali ya Taifa Muhimbili-Mloganzila Rechinold Kessy akielezea namna ya kuacha matumizi ya tumbaku kwa wanafunzi wa Shule ya Sekondari Mama Salma Kikwete wakati wa utoaji wa elimu ya madhara ya matumizi ya tumbaku.

Wanafunzi wa Shule ya Sekondari Mama Salma Kikwete wakisikiliza elimu ya madhara ya matumizi ya tumbaku kutoka kwa wataalam wa afya wa MNH-Mloganzila.

Muuguzi mbobezi wa magojwa ya afya ya akili kutoka MNH-Mloganzila Leticia akielezea madhara ya matumizi ya tumbaku wanafunzi wa Shule ya Mama Salma Kikwete wakati wa utoaji wa elimu ya madhara ya matumizi ya tumbaku

Wanafunzi wa Shule ya Sekondari Mama Salma Kikwete wakisikiliza elimu ya madhara ya matumizi ya tumbaku kutoka kwa wataalam wa afya wa MNH-Mloganzila

Daktari Bingwa wa Magonjwa ya Afya ya Akili kutoka MNH-Mloganzila Dkt Janet Komba akielezea kwa wanafunzi wa Shule ya Mama Salma Kikwete namna mtu anavyoanza matumizi ya tumbaku na hatimaye kuzoea na hatimaye kuwa ngumu kuacha.

Matumizi ya tumbaku yanaathiri mfumo wa fahamu wa binadamu kwa kuwa kuna kichocheo kiitwacho nikotini ambacho kinafanya mtu ajione kama ana nguvu nyingi, hivyo kupenda kuitumia mara kwa mara.

Hayo yamesemwa na Daktari Bingwa wa Magonjwa ya Afya ya Akili kutoka Hospitali ya Taifa Muhimbili-Mloganzila, Dkt. Janet Komba alipokuwa akitoa elimu juu ya athari za matumizi ya tumbaku kwa wanafunzi wa kidato cha nne wapatao 120 wa Shule ya Sekondari Mama Salma Kikwete iliyopo Manispaa ya Kinondoni ikiwa ni maadhimisho ya siku ya kupinga matumizi ya tumbaku duniani ambayo hufanyika Mei 31 kila mwaka.

Dkt. Komba ameongeza kuwa wakati wa kuanza uvutaji kunakuwa na changamoto nyingi ikiwemo kukohoa, kichwa kuuma, mapigo ya moyo kwenda kwa kasi na kujihisi kuumwa lakini mtu akishazoea inakuwa ngumu kuacha kutokana na kichocheo kilichopo kwenye tumbaku.

“Tumbaku inapatikana katika matumizi mbalimbali kama sigara, ugolo ambapo kadiri unavyoitumia ndivyo unavyoendelea kuzoea na kutaka kuitumia kila wakati na athari yake ni kubwa kwani husababisha mtu kupata magonjwa kama kiharusi, mshtuko wa moyo, saratani ya koo na mdomo. ” amesema Dkt Komba.

Naye Afisa Muuguzi kutoka MNH- Mloganzila, Rechinold Kessy ameeleza kuwa inawezekana kuacha matumizi ya tumbaku kwa kupunguza matumizi kwa siku, kuwa na siku ambazo mtu hatumii kabisa tumbaku na hatimaye kuacha kabisa.

Kwa upande wake mwanafunzi Mohamed Sengo amewashauri wanafunzi wenzake kutojihusisha na matumizi ya tumbaku ikiwemo bangi kwakuwa huchangia mwenendo mbaya wa kitaaluma na kujihusisha katika makundi yasiyofaa.

Akilezea mambo yanayosababisha wanafunzi kuingia katika matumizi ya tumbaku na dawa za kulevya, mwanafunzi Sabrina Chengeka amesema inatokana na baadhi ya wanafunzi kuwa na marafiki wasiofaa, baadhi ya wazazi kutofuatilia mienendo ya watoto wao hivyo kujihisi wako huru sana hatimaye wanajiunga katika makundi yasifaa na kuanza kutumia bidhaa za tumbaku na dawa za kulevya.

Aidha, walimu wa Shule hiyo wameishukuru MNH- Moganzila kwa kufika shuleni hapo kutoa elimu kwani itasaidia wanafunzi kubadili tabia na kuwajenga katika maadili mema.

Gharama za magonjwa yatokanayo na matumizi ya tumbaku kila mwaka ni dola trilioni 1.4 kote ulimwenguni kwa mujibu wa taarifa ya Shirika la afya duniani, WHO iliyotolewa  Mei 31 kuadhimisha siku ya kimataifa ya kupinga matumizi ya tumbaku.